«Ձայնադարանի ստղծումը և զարգացումը» ուսումնական նախագիծ.
Մենք բոլորս ապրում ենք թվային տեխնոլոգիաների դարաշրջանում: Այն այնքան է մուտք գործել մեր կյանք, որ անգամ մարդկային շփումների մեջ առանց դրանց ինչ– որ բան մնում է կիսատ:
Դասավանդող և սովորող կապը բոլոր ժամանակներում եղել Է կարևոր, առաջնային հարց: Դասավանդողը ուզում է իր գիտելիքները, կյանքի փորձը, մարդկային որակները փոխանցել սովորողին, իսկ սովորողը փորձում է դրանք քաղել, նմանվել ուսուցչին: Թվային միջոցները դարձել են սովորողին կրթելու, դաստիարակելու, ճանաչելու, փոխհարաբերվելու արագ միջոց:
Դրա համար էլ շատ կարևոր է պրոֆեսիոնալ ուսումնական կայքերի ստեղծումը, նրանց անընդհատ ակտիվությունը և գործուն լինելը: Նմանատիպ ֆունկցիա են իրենց վրա վերցրել «Մխիթար Սեբաստացի» կրթահամալիրում ստեղծված բազմաթիվ ուսումնական կայքերը, բլոգները, էլեկտրոնային ամսագրերը: Այդ շարքին կարելի է դասել նաև «Ձայնադարանը»:
«Ձայնադարան» երաժշտական կայքի ստեղծումը և զարգացումը կատարվել և կատարվում է փուլ առ փուլ: Սկզբում առաջնային խնդիր էր ճանաչելի, ներկայանալի լինելը մեդիադաշտում, որին օգնել է բազմաժանր, բազմաբովանդակ պրոֆիլով գործելաոճը: Այսօր խնդիրներն այլ են:
Քանի որ «Ձայնադարանը» ուսումնական կայք է, որից օգտվում են հարյուրավոր սովորողներ, ծնողներ և դասավանդողներ, առաջին հերթին հիմնական խնդիր եղել և մնում է հեղինակային մանկավարժական ծրագրերի ամբողջացումը, ճիշտ ներկայացումը և փոխանցումը:
Ուսումնական նախագծերը և դրանց հիման վրա ստեղծված նյութերը պետք է համակարգվեն ճիշտ ժամանակին, լինեն ծրագրային, մեթոդական, ունենան համապատասխան որակ: Այնտեղ տեղ գտնող նյութերը կարող են ենթարկվել լրացումների և հավելյալ մշակման: Այլ աղբյուրից «Ձայնադարան» բերված ցանկացած նյութի վերջում անպայման նշվում է սկզբնաղբյուրը հեղինակային իրավունքների պաշտպանության և լրացուցիչ տեղեկատվության համար։
Երկրորդ խնդիրն է դառնալ պատվիրատու հեղինակային մանկավարժական ծրագրերի ստեղծման և տարածման համար:
Այսօրվա հեղինակային մանկավարժական ծրագրերի արագ զարգացմանը և տարածմանը զուգահեռ կա նոր ուսումնական նյութերի ստեղծման և թարմացման անհրաժեշտություն: Հենց այստեղ «Ձայնադարանը» պետք է դառնա պատվիրատու ՝ ներառելով և օգտագործելով դասավանդողների, սովորողների և ծնողների հմտությունները:
Ձայնադարանի առանցքային կենտրոններից մեկը սովորողն է, նրա ընտանիքի անդամը, նրանց երաժշտական ընդունակությունների ու դրսևորումների բացահայտումը և ցուցադրումը:
«Ձայնադարանը» մեդիագրադարանի բաղկացուցիչ մասն է: Այն պարբերաբար անդրադառնում է հայտնի երաժիշտների կյանքին, գործունեությանը, երաժշտական, մշակութային անցուդարձին: Տեղեկատվական նյութերը ստեղծվում են շատ անգամ կրթահամալիրի պատվերով, ինչպես նաև կարող են լինել առանձին դասավանդողի, սովորողի, խմբերի նախաձեռնությունների արդյունք:
«Ձայնադարանի» խնդիրներից է նաև ունկնդրի երաժշտական և գեղագիտական ճաշակի բարձրացումը: Այդ պատճառով այնտեղ պարբերաբար ստեղծվում և հրապարակվում են երաժշտական ունկնդրման փաթեթներ, որոնք բազմաոճ են, բազմաժանր, նոր ու թարմ:
«Ձայնադարանի» գլխավոր նպատակը սովորողի համար իսկական ուսումնական, կրթական գործիք դառնալն է, ճանաչելի և հասանելի լինելը:
Հասմիկ Մաթևոսյան 